56.12 F
Washington DC
February 25, 2021
Satenaw Ethiopian News/Breaking News
Amharic News

“የአገልግሎት ሰጪ ተቋማት ውጤታማነት የመንግሥትን ሕዝባዊ ቅቡልነት ይወስናል” ኮሚሽነር በዛብህ ገብረየስ

“የአገልግሎት ሰጪ ተቋማት ውጤታማነት የመንግሥትን ሕዝባዊ ቅቡልነት ይወስናል” ኮሚሽነር በዛብህ ገብረየስ

ባሕር ዳር፡ የካቲት 05/2013 ዓ.ም (አብመድ) የመንግሥት አገልግሎት ዘርፍ ተቋማት ዘመን ተሸጋሪ፣ ከማንኛውም ጣልቃ ገብነት ነጻና በሙያ ብቃቱ የሚያገለግል ባለሙያ እንዲኖራቸው የሚያስችል የምክክር መድረክ በባሕር ዳር ከተማ እየተካሄደ ነው።

የፌዴራል ሲቪል ሠርቪስ ኮሚሽን ኮሚሽነር በዛብህ ገብረየስ በፕላዝማ ባስተላለፉት መልዕክት አገልግሎት ሰጪ ተቋማት በታሪክ የሀገረ መንግሥት ግንባታን በማስቀጠል ከፍተኛ ሚና መጫወታቸውን አንስተዋል፡፡

አገልግሎት ሰጪ ተቋማት ተፈጥሯዊ እና ሰው ሠራሽ ችግሮችን በመቋቋም በሀገር ወዳድነት መንፈስ እያገለገሉ እንደሚገኙ አስታውቀዋል፡፡

ኮሚሽነሩ “የአገልግሎት ሰጪ ተቋማት ውጤታማነት የመንግሥትን ሕዝባዊ ቅቡልነት ይወስናል” ብለዋል፡፡ በቀጣይ 10 ዓመታት ለመተግበር በተዘጋጀው የለውጥ ፍኖተ ካርታ ነጻ፣ ገለልተኛ እና ብቃት ያለው ሲቪል ሰርቪስ መገንባት፤ የሰው ሃብት ልማት አስተዳደር ስርዓቱ እና የሠራተኞችን የመፈጸም አቅም ማሳደግ፤ እሴት ግንባታና ሥነ ምግባር ቀረጻን ማጎልበት እንዲሁም ውጤታማ የመንግሥት አገልግሎት ግንባታን በሁሉም አደረጃጀቶች ላይ ለመተግበር መታቀዱን ተናግረዋል፡፡

የአገልግሎት ዘርፍ ተቋማት በቅንነት፣ በታማኝነት፣ በሀገር ወዳድነት እና በኢትዮጵያዊ ጨዋነት ሀገርና ሕዝብን በማገልገል አስተማማኝ ሰላምን እና ሀገራዊ ብልጽግናን ማረጋገጥ እንደሚጠበቅባቸውም ነው ኮሚሽነሩ የተናገሩት፡፡

የሰላም ሚኒስትሯ ሙፈሪሃት ካሚል አማካሪ አብዱ ዘነበ (ዶክተር) በመንግሥትና በሕዝብ ዘንድ መተማመን ለመፍጠርና አስተማማኝ ሰላም ለማስፈን ሲቪል ሰርቪሱ በትኩረት ሊሠራ እንደሚገባ ገልጸዋል፡፡ ለዚህም የሰላምን ምንነት በሚገባ መረዳት፣ የሕዝብን ተሳትፎና መሪነት ማረጋገጥ፣ ኢትዮጵያዊነትን ማስቀደም እና ያለፉ መልካም ሥራዎችን ማጉላት ይገባል ብለዋል፡፡

በሰላም ሚኒስቴር የአስተዳደር ድጋፍ ዳይሬክተር ጀኔራል መብራቱ ካሳ አገልግሎት ሰጪ ተቋማት በፖለቲካ ተጽዕኖ ሥር ወድቀው በሁኔታዎች የሚለዋወጥ ባሕሪ እያሳዩ መሆኑን አንስተዋል፡፡ ይህንን በማስተካከል ከተጽዕኖ ነጻ የሆነ፣ ብቃት ያለው፣ ገለልተኛ እና ዘመን ተሻጋሪ ተቋም ለመገንባት እየተሠራ መሆኑን ጠቅሰዋል፡፡

የውይይቱ ተሳታፊዎችም በሀገሪቱ አስተማማኝ ሰላም እንዲሰፍንና በዘርፉ የሚስተዋሉ ችግሮችን በመፍታት ቀልጣፋ አገልግሎት ለመስጠት የድርሻቸውን እንደሚወጡ ተናግረዋል፡፡

ዛሬ የተካሄደው ብሔራዊ የመንግሥት አገልግሎት ዘርፍ ተኮር የምክክር መድረክ የሀገራዊ የምክክር መድረክ አንዱ አካል ነው ተብሏል፡፡

ዘጋቢ፡- ደጀኔ በቀለ

ተጨማሪ መረጃዎችን ከአብመድ የተለያዩ የመረጃ መረቦች ቀጣዮቹን ሊንኮች በመጫን ማግኘት ትችላላችሁ፡፡

Source link

Related posts

“ዳያስፖራው ድጋፍና አብሮነቱን ለማሳየት ለገበታ ለአገር 27 ሚሊዮን ብር ድጋፍ አድርጓል” የውጭ ጉዳይ ሚኒስቴር

admin

የቆላማ አከባቢዎች የኑሮ ማሻሻያ ፕሮጀክት አተገባበር  ዙሪያ ውይይት ተካሄደ

admin

“መረባ” ብላለች ያቺ የራያ እናት ሠላም እንዲመጣ ክፉ እንዳያገኛት”

admin