76.68 F
Washington DC
June 17, 2021
Satenaw Ethiopian News/Breaking News
Amharic News

የአማራ ክልል ትምህርት ቢሮ በቅርቡ ተግባራዊ የሚኾን አዲስ የሥርዓተ ትምህርት ይፋ አድርጓል፡፡

የአማራ ክልል ትምህርት ቢሮ በቅርቡ ተግባራዊ የሚኾን አዲስ የሥርዓተ ትምህርት ይፋ አድርጓል፡፡

ባሕር ዳር፡ ሰኔ 03/ 2013 ዓ.ም (አሚኮ) አዲሱን የሥርዓተ ትምህርት ይፋ ያደረጉት የአማራ ክልል ትምህርት ቢሮ ኀላፊ ይልቃል ከፋለ (ዶክተር) ናቸው፡፡ ዶክተር ይልቃል ሥርዓተ ትምህርቱ የነበሩበትን ክፍተቶች ለመሙላት በሀገር አቀፍ ደረጃ የፍኖተ ካርታ ሲዘጋጅ መቆየቱን ገልጸዋል፤ በዚህም መሰረት በጥናት የተለዩ ችግሮች ውይይት ሲደረግባቸው መቆየቱ ነው የተገለጸው፡፡

ዶክተር ይልቃል እንዳሉት አዲሱን ሥርዓተ ትምህርት በትምህርት ቤቶች አደረጃጀት ይለያል፡፡አደረጃጀቱም የቅድመ መደበኛን ጨምሮ ከ1እስከ 6ኛ ያሉትን አንደኛ ደረጃ፣ ከ7 እስከ 8 ያሉትን መለስተኛ ሁለተኛ ደረጃ፣ ከ9 እስከ 12ኛ ያሉትን ደግሞ ሁለተኛ ደረጃ በሚል ተደራጅቶ ወደ ሥራ እንዲገባ መወሰኑን አብራርተዋል፡፡

የመምህራን ስልጠና ሥርዓትን በተመለከተ ከምልመላ ጀምሮ የስልጠና አይነት እና ጊዜ እንዲሻሻል መደረጉንም ዶክተር ይልቃል ተናግረዋል፡፡ የትምህርት ጥራትን ለማስጠበቅ ሥርዓተ ትምህርቱን በሀገር አቀፍ ደረጃ ወጥነት እንዲኖረው የትምህርት ማዕቀፍ እንዲዘጋጅ ተደርጓል ነው የተባለው፡፡ የመማሪያ መጽሐፍትን ይዘት በተመለከተ በተማሪዎች መማሪያ መጽሐፍት እና በመምህራን መምሪያ ላይ ሀገር በቀል እውቀቶች እና ማኅበራዊ እሴቶች ላይ አተኩሮ እንዲቀረጽ እንደሚደረግ ዶክተር ይልቃል ጠቁመዋል፡፡

ሁለተኛ ደረጃ ላይ የትምህርት አሰጣጡን በተመለከተ በሁለት መንገድ ሊሰጥ እንደታሰበ ነው የጠቆሙት፡፡ይህም የቀለም ትምህርት እና የሙያ ትምህርት ተብሎ እንደሚሰጥ ተገልጿል፡፡ አሠራሩ ተማሪዎች 12ኛ ክፍልን ሲያጠናቅቁ ወደ ቀጣይ የቀለም ትምህርት መሸጋገር ያልቻሉ በቀጥታ ወደ ሥራ ሊገቡ የሚችሉበትን ሁኔታ እንደሚፈጥርም ዶክተር ይልቃል አብራርተዋል፡፡ ትግበራውም በቀጣይ ዓመት ከ1ኛ እስከ 6ኛ ክፍል በተመረጡ ትምህርት ቤቶች፣ ከ7ኛ እስከ 8ኛ ክፍል ባሉ ኹሉም ትምህርት ቤቶች ተግባዊ ለማድረግ ታቅዶ እየተሠራ እንደኾነም ተብራርቷል፡፡

የማስተማሪያ ቋንቋን በተመለከተ በአማርኛ፣ በአዊኛ፣ በኽምጣና እና በአፋን ኦሮሞ ቋንቋዎች እንደሚኾን እና ሥርዓተ ትምህርቱም በዚሁ እንደሚዘጋጅ ያብራሩት ዶክተር ይልቃል የአርጎበኛ ቋንቋን ለማካተት የማጥናት ሥራ እየተሰራ ነው ብለዋል፡፡ ዶክተር ይልቃል የግእዝ ቋንቋን በሥርዓተ ትምህርቱ ለማካተት ዝግጅት እየተደረገ እንደኾነም ነው የጠቆሙት፡፡

ዘጋቢ፡- ጌታቸው ደገፋው

ተጨማሪ መረጃዎችን ከአሚኮ የተለያዩ የመረጃ መረቦች ቀጣዮቹን ሊንኮች በመጫን ማግኘት ትችላላችሁ፡፡

Source link

Related posts

“ሁለተኛዋ የመሬት ምልከታ ሳተላይት የሙከራ ሥራዎችን በተሳካ ሁኔታ እያከናወነች ነው” የኢትዮጵያ ስፔስ ሳይንስ እና ቴክኖሎጂ ኢንስቲትዩት

admin

ለአፍሪካ ነፃነት-የኢትዮጵያ ተምሳሌት | የአማራ ብዙኃን መገናኛ ድርጅት

admin

ግንቦት 20 ከትግራይ ክልል በቀር በሌሎች አካባቢዎች ሳይከበር ቀረ – ESAT Amharic

admin