71.98 F
Washington DC
May 17, 2021
Satenaw Ethiopian News/Breaking News
Amharic News

“የሐዲስ ኪዳኗ ሐሙስ” | አማራ ሚዲያ ኮርፖሬሽን

“የሐዲስ ኪዳኗ ሐሙስ”

ባሕር ዳር፡ ሚያዝያ 21/2013 ዓ.ም (አሚኮ) ሰሞነ ሕማማት ብሉይ ኪዳን ወደ ሐዲስ ኪዳን የተቀየረበት ወቅት ነው፡፡ ለዓለም መዳን መስዋዕት የሆነው ኢየሱስ ክርስቶስ ከሆሳዕና እስከ ትንሣኤው መገለጥ ድረስ ባለው ሰሞነ ሕማማት ነቢቡን ሁሉ ገቢር አድርጓል፡፡ በነብያት የተነገረው ትንቢት እና ለሦስት ዓመታት ከሦስት ወራት በእግሩ እየዞረ ያስተማረውን ትምሕርት ሁሉ በሰሞነ ሕማማት ይፈፅም ዘንድ ግድ ይል ነበር ይላሉ የሃይማኖቱ ሊህቃን ሲያስተምሩ፡፡

ከሰሞነ ሕማማት አንዷ የሆነችው ሐሙስ በርካታ ስያሜ አላት፡፡ የትህትና ሐሙስ፣ የሐዲስ ኪዳኗ ሐሙስ፣ ሕጽበተ ሐሙስ እና ጸሎተ ሐሙስ በመባል ትጠራለች፡፡

በደብረ ታቦር ዩኒቨርሲቲ የግዕዝ ሥነ ጽሑፍ መምሕር አባ እንድርያስ አምባቸው ክርስቶስ በጸሎተ ሐሙስ ሁለት ታላላቅ ነገሮችን ፈፅሟል ይላሉ፤ ትህትናን እና ተግባርን፡፡ ከብሉይ ኪዳን ወደ ሐዲስ ኪዳን ለመሸጋገር ይህች ቀን የመጀመሪያዋ ሐሙስ ነበረች ብለዋል – አባ እንድሪያስ፡፡

ክርስቶስ ትህትናን ሲያስተምር ንጉሥ ሳለ ባሪያ፣ አዛዥ ሳለ ታዛዥ፣ ሁሉን ሲችል በትህትና ዝቅ ያለበት እና የደቀመዛሙርቱን እግር ያጠበበት ቀን ናት ይላሉ፡፡ “እኔ እንዳስተማርኳችሁ እናንተም አስተምሩ” ያለውም ፍቅርን፣ ትህትናን እና ራስን ዝቅ ማድረግን ነበር ብለዋል፡፡

ዛሬ ላይ ያሉ የሃይማኖት አባቶች የታናናሾቻቸውን እግር ዝቅ ብለው ሲያጥቡም “የክርስቶስን መስቀል ለመቀበል ዝግጁ ነን” ማለታቸው ነው ብለዋል – አባ እንድሪያስ፡፡

የዓለም መንግሥታት፣ ሕዝቦቻቸው እና ነገሥታት ከክርስቶስ ትህትናን ሊማሩ ይገባል ነው ያሉት፡፡ የዓለም ችግሮች እና ጉድለቶች፣ ግጭቶች እና ጦርነቶች፣ ርሃብ እና አድማ ምንጫቸው ትዕቢት በመሆኑ ክርስቲያኖች ብቻ ሳይሆኑ ዓለም ከክርስቶስ ትህትናን ለመማር ዛሬ ከትናንት የተሻለ አስተማሪ ነው ብለዋል፡፡

ክርስቶስ በጸሎተ ሐሙስ ከፈፀማቸው እና ካስተማራቸው አንዱ የተናገረውን መተግበር ነበር ይላሉ አባ እንድሪያስ፡፡ “እርስ በርሳችሁ ተዋደዱ” ያለው ክርስቶስ ስለሰው ልጅ ፍቅር ተላልፎ መሰጠትን በተግባር ለመቀበል ሲዘጋጅ በአልዓዛር ቤት የቀረበውን ህብስት እና ወይን “ስጋዬ እና ደሜ ነው” ብሎ ሰጠ ብለዋል፡፡ ትህትናን በስብከቱ ያስተማረ ክርስቶስ እርሱ ትሁት ሆኖ አሳየን የሚሉት መምህሩ ነገሥታት ከዓለም ንጉስ ክርስቶስ የተናገሩትን መተግበርን፣ ቃላቸውን ማክበርን እና መታመንን መማር ግድ ይላቸዋል ነው ያሉት፡፡

ከክርስቶስ ሞት እና ትንሣኤ ኢትዮጵያውያን መማር ያለባቸውም ከሞት በኋላ ሕይዎት፣ ከመሳደድ ማግሥት እረፍት፣ ከድካም በኋላ ድሎት መሆኑን መገንዘብ ግድ እንደሚል አስረድተዋል – አባ እንድርያስ፡፡ ስለሌሎች መኖርን ለመማር ከዛሬ የተሻለ ቀን የለንም ብለዋል፡፡ ኢትዮጵያውያን ለራሳቸው ሊደረግላቸው የሚሹትን ለሌሎች በማድረግ፣ በራሳቸው ሊደረግ የማይፈልጉትን በሌሎች ላይ ባለማድረግ እና በመከባበር መኖርንም ከአንድ ሳምንት ተግባር አውጥቶ የሕይዎት ግብር ማድረግ ይገባል ብለዋል፡፡

ከሰሞነ ሕማማት በኋላ በሚመጣው የትንሣዔ ብርሃንም ያላቸው የሌላቸውን በማየት፣ የታመሙትን በመጠየቅ፣ እስረኞችን በመጎብኘት እና የተፈናቀሉ ወገኖችን አብሮነትን በማሳየት ማክበር ክርስቲያናዊ ተግባር ነው ብለዋል፡፡

ዘጋቢ፡- ታዘብ አራጋው

ተጨማሪ መረጃዎችን ከአሚኮ የተለያዩ የመረጃ መረቦች ቀጣዮቹን ሊንኮች በመጫን ማግኘት ትችላላችሁ፡፡

Source link

Related posts

በአፋር ክልል 36 የህግ ታራሚዎች በይቅርታ ተለቀቁ

admin

በህንድ በኮሮና ቫይረስ ምክንያት የሟቾች ቁጥር እየጨመረ ነው

admin

ጠላቶቻችንን በግራ እጃችን እየጠበቅን በቀኝ እጃችን  እየሰራን  መሆን አለበት- ጠ/ሚ ዐቢይ

admin