38.1 F
Washington DC
February 27, 2021
Satenaw Ethiopian News/Breaking News
Amharic News

እጅግ የተከበሩ የዓለም ሎሬት ዶክተር ጥበበ የማነ ብርሃን ማን ናቸው?

እጅግ የተከበሩ የዓለም ሎሬት ዶክተር ጥበበ የማነ ብርሃን ማን ናቸው?

ባሕር ዳር፡ የካቲት 14/2013 ዓ.ም (አብመድ) እርሳቸው ብቻ ሳይሆኑ የአኗኗር ዘይቤያቸው እንኳን ሳይቀር ፍፁም ኢትዮጵያዊ እንደሆነ ይነገራል፡፡ የተወለዱት ሀረር፤ ከልጅነት ጀምሮ እድገታቸው ደግሞ አዲስ አበባ ውስጥ ነው፡፡ የወታደር ልጅ የነበሩት የያኔው ታዳጊ እና የቅርብ ዘመኑ የዓለማችን እጅግ ክቡር ሰው የበዛውን የልጅነት ጊዜያቸው በወታደር ካምፕ ውስጥ ማሳለፋቸው ጥልቀት ላለው ኢትዮጵያዊ እሳቤያቸው እና ድርጊታቸው መሰረት ሳይጥልላቸው አልቀረም፡፡

በልጅነታቸው እና በትምህርት ቤት ቆይታቸው የተቸገሩትን በመርዳት እስከመጨረሻው ደረጃ ‹‹ሮበር ቦይ ስካውት›› ድረስ ማገልገልን ተላምደዋል፡፡ በወቅቱ ለነበረው ሰፊ የተማሪዎች ምጣኔ ሃብታዊ ችግር መፍትሄ ለመፈለግ ማሰብን የተለማመዱት እጅግ የተከበሩ የዓለም ሎሬት ዶክተር ጥበበ የማነ ብርሃን ‹‹የ10 ወንድማማቾች ሕብረት›› የሚል ማኅበር አቋቋሙ፡፡ በወቅቱ የነበሩ ወጣቶች የተለያዩ ኦርኬስትራዎችን ማየት ያስደስታቸው እንደነበር የተረዱት የማኅበሩ አባላት ከክቡር ዘበኛ ኦርኬስትራ፣ ከጦር ሠራዊት ኦርኬስትራ እና ከፖሊስ ኦርኬስትራ አንዳንድ ጊዜ በትብብር ብዙ ጊዜም በአነስተኛ ወጭ በማስመጣት እና ገቢ በማሰባሰብ ችግረኛ ህፃናት ተማሪዎችን በዘላቂነት የሚያግዙበትን መንገድ አመቻቹ፡፡

ለተባበሩት መንግሥታት ድርጅት ዋና ጸሐፊነት የተወዳደሩት የመጀመሪያው ጥቁር አፍሪካዊ እና የተዋጣላቸው ዲፕሎማት እንደነበሩ የሚነገርላቸው ልጅ እንዳልካቸው የሹመት ደብዳቤያቸውን ለንግስት ኤልሳቤጥ ሲያቀርቡ የተቀረፀውን ቪዲዮ ከአባታቸው ጋር መኮንኖች ክለብ አይተው በልጅነታቸው ዲፕሎማት የመሆን ፍላጎት አደረባቸው፡፡ ነገር ግን የቀደመውን ፍላጎታቸውን የቀየረ እና የህይዎት መስመራቸውን የለወጠ አዲስ ክስተት ተፈጠረ፡፡

እናታቸው በፀና ታመው በቀድሞው ልዕልተ ፀሃይ በአሁኑ ጦር ኃይሎች ሆስፒታል ለህክምና እርዳታ ገቡ፡፡ የእናታቸው የህክምና ጉዳይም ሁለት አማራጮች ተቀመጡለት ወደውጭ ሀገር ሄዶ መታከም ወይ በሀገር ውስጥ ቀዶ ጥገና ማድረግ፡፡ ፕሮፌሰር ታየ መኩሪያ እና ባልደረቦቻቸው ሙሉ ኀላፊነቱን ወስደው የተሳካ ቀዶ ጥገና አካሄዱ፡፡

በሆስፒታሉ ውስጥ የፕሮፌሰር አስራት ወልደየስ እና የፕሮፌሰር ታየ መኩሪያን ሙያዊ ክህሎት፣ ታታሪነት እና ክብር ካዩ በኋላ ሐኪም የመሆን ፅኑ ፍላጎት አደረባቸው፡፡ በመጨረሻም ራሺያ የወዳጅነት ማኅበር በሰጠው ነፃ የትምህርት ዕድል ወደ ሞስኮ አቀኑ፡፡ እርሳቸው ተማሪ በነበሩበት ወቅት 480 ዓመታትን ባስቆጠረው እና ጥንታዊው የሎቮቭ ስቴት ዩኒቨርሲቲ ለህክምና ትምህርት ስድስት ዓመታትን አሳለፉ፡፡

በ1968 ዓ.ም በቆዳ ህክምና የሁለተኛ ዲግሪያቸውን እና በ1970 ዓ.ም ደግሞ ሦስተኛ ዲግሪያቸውን በማዕረግ አጠናቀቁ፡፡ ከ1972 ዓ.ም እስከ 1985 ዓ.ም ድረስ በሎቮቭ ስቴት ዩኒቨርሲቲ ሪፈራል ሆስፒታል በአማካሪ ስፔሻሊስት እና ተባባሪ ፕሮፌሰርነት ከአገለገሉ በኋላ ወደሀገራቸው ተመለሱ፡፡

የመላው አፍሪካ የስጋ ደዌና መልሶ ማቋቋም ማዕከል አለርት ሆስፒታል ዋና የቆዳ ሐኪም እና የህክምና ትምህርት ክፍሉ የበላይ በመሆን አገልግለዋል፡፡

ከ60 በላይ የምርምር ሥራዎቻቸውን በዓለም አቀፍ የምርምር ጆርናሎች ያሳተሙት እጅግ የተከበሩ የዓለም ሎሬት ዶክተር ጥበበ የማነ ብርሃን በሀገራቸው ከ80 ሺህ በላይ ወገኖቻቸውን የዓይን ሞራ ግርዶሽ እንዲሠራላቸው በማድረግ ብርሃናቸውን መልሰዋል፡፡

‹‹ስምን መልዓክ ያወጣዋል›› እንዲሉ እውቀት እና ጥበብ አብዝቶ የተቸራቸው እኒህ ሰው ትራኮማ ከአማራ ክልል እንዲጠፋ ከቀድሞው የሀገሪቱ ፕሬዚዳንት ዶክተር ነጋሶ ጊዳዳ ጋር የላየንስ ክለብ ፕሬዚዳንትን አሳምነው ከካርተር ሴንተር ጋር ችግሩን ታሪክ አድርገዋል፡፡

ኢትዮጵያ በዓለም ላይ ሁለት ልጆቿ በአንድ ቀን የዓለም ሎሬትነት ክብርን ያገኙላት ብቸኛ ሀገር ናት፡፡ በአውሮፓዊኑ ሚሊኒየም መባቻ በሀገረ አሜሪካ ከነጩ ቤተመንግስት ጎን ኢንተር ኮንቲኔታል ሆቴል እጅግ የተከበሩ የዓለም ሎሬት ሜትር አርቲስት አፈወርቅ ተክሌ እና እጅግ የተከበሩ የዓለም ሎሬት ዶክተር ጥበበ የማነብርሃን ሽልማቱን ተቀበሉ፡፡

በዓለም ላይ በርካታ ሽልማቶችን የተቀበሉት እጅግ የተከበሩ የዓለም ሎሬት ዶክተር ጥበበ የማነ ብርሃን ከሩሲያው ፕሬዚዳንት ቭላድሚር ፑቲን እጅ ሳይቀር የሀገሪቱን ከፍተኛ የማዕረግ ሽልማት አግኝተዋል፡፡

የዓለም ሎሬት ዶክተር ጥበበ የማነ ብርሃን በርካታ ሽልማቶችን ያገኙ ቢሆኑም ከኢቢሲ የአውደ ሰብ ፕሮግራም ላይ እንግዳ ሆነው በቀረቡበት ወቅት ከተሸለሟቸው በርካታ ሽልማቶች ውስጥ ለየትኛው ልዩ ፍቅር አለዎት ሲባሉ ‹‹በሃገር ውስጥ ያገኘኋቸው ሽልማቶች ልዩ ትርጉም ቢኖራቸውም ከ10 ዓመት በፊት በታሪኩ የመጀመሪያው የክብር ዶክትሬት የሰጠው የባሕር ዳር ዩኒቨርሲቲ ሽልማት ልዩ ስሜትን ይፈጥርብኛል›› ብለዋል፡፡

ሐኪም፣ ዲፕሎማት፣ አስተማሪ፣ ተመራማሪ፣ አስታራቂ እና ‹‹ኢትዮጵያዊ›› የሆኑት እጅግ የተከበሩ የዓለም ሎሬት ዶክተር ጥበበ የማነ ብርሃን 40 ዓመታትን በትዳር አሳልፈው፣ ሁለት ልጆችን አፍርተው እና በምድራዊ ቆይታቸው ማድረግ ከሚገባቸው በላይ ለወገኖቻቸው አበርክተው ህይወታቸው አልፏል፡፡

የአማራ ብዙኃን መገናኛ ድርጅት ለቤተሰቦቻቸው፣ ለወዳጅ ዘመዶቻቸው እና ለኢትዮጵያ ሕዝብ መጽናናትን ይመኛል፡፡

በታዘብ አራጋው

ተጨማሪ መረጃዎችን ከአብመድ የተለያዩ የመረጃ መረቦች ቀጣዮቹን ሊንኮች በመጫን ማግኘት ትችላላችሁ፡፡

Source link

Related posts

“የክትባት አቅርቦት እና የተጎጅዎች ቁጥር አለመመጣጠን ውሻን የሚያሳብድ በሽታ ለመከላከል ፈታኝ አድርጎታል” የአማራ ክልል ሕብረተሰብ ጤና ኢንስቲትዩት

admin

መሬት አስረክቦ ትዕግስት – እግር እያስበሉ ዝምታ …!!! (አባይነህ ካሴ)

admin

“ኢየሩሳሌምን መሠላት፣ ገነትን በምድር ሠራት”

admin