78.12 F
Washington DC
June 15, 2021
Satenaw Ethiopian News/Breaking News
Amharic News

በክልሎች የጎርፍ አደጋን ለመከላከል 300 ሚሊዮን ብር ተመድቦ ወደ ሥራ መገባቱን የኢትዮጵያ ተፋሰሶች ልማት ባለስልጣን አስታወቀ፡፡

በክልሎች የጎርፍ አደጋን ለመከላከል 300 ሚሊዮን ብር ተመድቦ ወደ ሥራ መገባቱን የኢትዮጵያ ተፋሰሶች ልማት ባለስልጣን አስታወቀ፡፡

ባሕር ዳር፡ ግንቦት 27/2013 ዓ.ም (አሚኮ) በመጪው ክረምት የጎርፍ አደጋ እንዳይከሰት 300 ሚሊዮን ብር ተመድቦ የመከላከያ ሥራዎች እየተከናወኑ መኾኑን ባለስልጣኑ አስታውቋል፡፡ የመከላከያ ተግባራቱ አማራ ክልልን ጨምሮ በሰባት ክልሎች የሚከናወን እንደኾነም ጸገልጿል፡፡

በባለፈው ዓመት የክረምት ወቅት ከመደበኛ በላይ ዝናብ ጥሎ በተለያዩ የኢትዮጵያ አካባቢዎች የጎርፍ አደጋ መድረሱ ይታወሳል፡፡ ባለስልጣን መሥሪያ ቤቱ እንዳስታወቀው ክረምት ከመግባቱ በፊት የተለያዩ ተግባራት ቢከናወኑም ከመደበኛ በላይ ዝናብ መጣሉን ተከትሎ የጎርፍ አደጋውን መቋቋም አልተቻለም፡፡ በዚህም በሰው እና በንብረት ላይ ከፍተኛ ጉዳት መድረሱ ይታወቃል፡፡

ባለፈው ዓመት የደረሰውን አደጋ መነሻ በማድረግ በዚህ ዓመት ከክልሎች ጋር በመቀናጀት የዳሰሳ ጥናት ተሠርቷል፡፡ በዳሰሳ ጥናቱ የጉዳቱ መጠን የታወቀ ሲኾን ለቀጣዩ ክረምት ለሚሠሩ ተግባራት ጥሩ ግብዓት እንደተገኘም በባለስልጣኑ የኮሚዩኒኬሽን ዳይሬክተር ጌትነት ጌጡ ለአሚኮ ተናግረዋል፡፡

አሁን ላይ በአማራ፣ በኦሮሚያ፣ በአፋር፣ በደቡብ ብሔር ብሔረሰቦችና ሕዝቦች፣ በሶማሌ፣ በጋምቤላ እና በሲዳማ ክልሎች የጎርፍ አደጋን መከላከል የሚያስችሉ ተግባራት እየተከናወኑ ነው ተብሏል፡፡ በአፋርና በኦሮሚያ ክልሎች አዋሽ ወንዝን ተከትሎ፣ በአማራ ክልል ርብና ጉማራ ወንዞች በሚገኙባቸው ፎገራና ሊቦከምከም ወረዳዎች፣ በደቡብ ብሔር ብሔረሰቦች ክልል በስልጤና በአላባ ዞኖች እንዲሁም በአርባ ምንጭ ከተማ ዙሪያ፣ በሶማሌ ክልል ፋፈን ወረዳ፣ በጋምቤላ ክልል ባሮ ወንዝ አካባቢ እንዲሁም በሲዳማ ክልል ሐዋሳ ከተማ ዙሪያ ነው ተግባራቱ እየተከናወኑ የሚገኙት፡፡

በተጠቀሱት አካባቢዎች የማፋሰሻ ቦይ ግንባታ፣ ደለል ማውጣትና የውኃን ተፈጥሯዊ ፍሰት የሚያግድ ቆሻሻን የማስወገድ ሥራዎች ናቸው እየተከናወኑ የሚገኙት፡፡ ለዚህም የፌዴራል መንግሥት 300 ሚሊዮን ብር መመደቡ ታውቋል፡፡

አቶ ጌትነት እንዳሉት የጎርፍ አደጋ መከላከያ ተግባራቱ ከክልሎች ጋር በቅንጅት ይሠራሉ፤ የግንባታ ሥራዎቹ የተሰጡትም ለየክልሎቹ የግንባታ ተቋራጭና አማካሪ ድርጅቶች (የመንግሥት የልማት ድርጅቶች) ነው፡፡

በአንዳንድ ክልሎች ዘግይቶ መጀመር፣ ማሽን የማስገባት ሥራን በፍጥነት አለማከናወን እና በቂ መሣሪያ አለማስገባት ችግሮች ቢኖሩም ሥራው ክረምት ከመግባቱ በፊት እንዲጠናቀቅ እየተሠራ ነው ብለዋል፡፡

የኮሙዩኒኬሽን ዳይሬክተሩ እንዳሉት የጎርፍ አደጋን ለመከላከል የተጀመረውን ሥራ ውጤታማነት ለመከታተልና ድጋፍ ለማድረግ የፌዴራል ከፍተኛ የሥራ ኀላፊዎች የተካተቱባቸው ኮሚቴዎች ተዋቅረዋል፡፡ ባለስልጣን መሥሪያ ቤቱም የቴክኒክ ድጋፍ እንደሚያደርጉም ጠቅሰዋል፡፡

ዘጋቢ፡- ደጀኔ በቀለ

ተጨማሪ መረጃዎችን ከአሚኮ የተለያዩ የመረጃ መረቦች ቀጣዮቹን ሊንኮች በመጫን ማግኘት ትችላላችሁ፡፡
ዩቱዩብ https://bit.ly/2RnNHCq
በዌብሳይት amharaweb.com
በቴሌግራም https://bit.ly/2wdQpiZ
ትዊተር https://bit.ly/37m6a4m

Source link

Related posts

“ኢትዮጵያ ድርድሩ በአፍሪካ ሕብረት በኩል እንዲካሄድ የያዘችው አቋም ለሕብረቱ ያላትን ክብርና እውቅና የሚያሳይና የሚደነቅ ነው” መሀመድ አል አሩሲ አክቲቪስትና የፖለቲካ ተንታኝ

admin

ለትምህርት ሚኒስቴር 500 ሺህ ማስክና 11 ሚሊየን ብር ግምት ያላቸው የሙቀት መለኪያ መሳሪያዎች ድጋፍ ተደረገ

admin

ዳውን ዳውን ኢትዮጵያ? (አንተነህ መርዕድ)

admin