36.68 F
Washington DC
February 27, 2021
Satenaw Ethiopian News/Breaking News
Amharic News

ማህበራዊ ሚዲያን በመጠቀም የተገነባው ጤና ጣቢያ ተመረቀ።

ማህበራዊ ሚዲያን በመጠቀም የተገነባው ጤና ጣቢያ ተመረቀ።

ባሕር ዳር ፡ የካቲት 07/2013 ዓ.ም (አብመድ) በምዕራብ ጎጃም ዞን ደጋ ዳሞት ወረዳ ለ3 ዓመታት ተቋርጦ የቆየን ጤና ጣቢያ በሀገር ውስጥ እና በውጭ ሀገር ያሉ የአካባቢው ተወላጆች ቴሌግራምን በመጠቀም 3 ብሎክ ያለው ጤና ጣቢያ አስገንብተው ለአገልግሎት ዝግጁ አድርገዋል።

የድንጋይ በር ሀገረ ማርያም ጤና ጣቢያ በ2009 ዓ.ም በህብረተሰብ ተሳትፎ ግንባታው ተጀምሮ በበጀት እጥረት ለ3 ዓመታት ተቋርጦ ቆይቷል።

የጤና ጣቢያው አለመገንባት ቁጭት የፈጠረባቸው የአካባቢው ተወላጆች ባለሃብቶችን ፣ የአካባቢውን ህብረተሰብ እና አልማን በማስተባበር ግንቦት 2012 ዓ.ም ግንባታውን አስጀምረው በዛሬው ዕለት ለምረቃ አብቅተዋል።

የደጋ ዳሞት ወረዳ ዋና አስተዳዳሪ አቶ ዋለ እንግዳ የወረዳው መልክዓ ምድር አስቸጋሪ በመሆኑ የመሰረተ ልማት ዝርጋታ ያልተሟላ መሆኑን ገልፀው የአካባቢው ተወላጆች እና ህብረተሰቡ ከመንግሥት ጎን በመሆን ላደረጉት ድጋፍ ምስጋናቸውን አቅርበዋል።

“ወረዳው በ34 ቀበሌዎች የተዋቀረ ሲሆን፤ 7 ጤና ጣቢያ ፣ 1 የመጀመሪያ ደረጃ ሆስፒታል እና 34 ጤና ኬላዎች አሉት” ያሉት ዋና አስተዳዳሪው ከእነዚህ ውስጥ 5ቱ ጤና ጣቢያዎች የውኃ አቅርቦት የላቸውም፤ መንገድ እና መብራት ያልተሟላላቸው ጤና ኬላዎች እና ጤና ጣቢያዎችም ስላሉ ህብረተሰቡ አሁን ያሳየውን ድጋፍ አጠናክሮ መቀጠል አለበት ብለዋል።

በማህበራዊ ሚዲያ ገንዘብ በማሰባሰብ ከተሳተፉት መካከል አቶ ደረጀ በላይነህ አካባቢው የመንገድ መሰረተ ልማት ችግር ያለበት በመሆኑ ህብረተሰቡ ለእንግልት መዳረጉን በመመልከት ከሌሎች ጓደኞቻቸው ጋር በመሆን በቴሌግራም ገንዘብ በማሰባሰብ ተቋርጦ የቆየውን ጤና ጣቢያ በመጨረስ ለአገልግሎት ዝግጁ ማድረጋቸውን ተናግረዋል።

አንዳንድ ግለሰቦች ማህበራዊ ሚዲያን ለግጭት እና ለሁከት ከመጠቀም ይልቅ ለመልካም ተግባር እንዲገለገሉበትም አቶ ደረጀ መክረዋል።

የአካባቢው ነዋሪዎች በበኩላቸው በአካባቢያቸው ጤና ጣቢያ ባለመኖሩ ብዙ እናቶች በመንገድ ላይ ህይወታቸው ያልፍ እንደነበር ገልፀው ጤና ጣቢያው ከብዙ እንግልት እና ስቃይ እንደሚታደጋቸውም ተናግረዋል።

ጤና ጣቢያው ተጨማሪ ብሎኮች፣ የህክምና መስጫ ቁሳቁስ እና መሰረተ ልማት እንዲሟላለትም የአካባቢው ነዋሪዎች ጠይቀዋል።

የምዕራብ ጎጃም ዞን ምክትል አስተዳዳሪ እና የዞኑ ጤና ጥበቃ መምሪያ ኀላፊ አቶ ወንድሜነህ ልየው ማህበራዊ ሚዲያን ለመልካም ተግባር በመጠቀም ጤና ጣቢያውን ገንብተው ለምረቃ ላበቁት የአካባቢው ተወላጆች ምስጋናቸውን አቅርበዋል።

ጤና ጥበቃ መምሪያው ከ350 ሺህ ብር በላይ የሚያወጡ ቁሳቁስ እና መድኃኒት በማሟላት እንዲሁም የሰው ኃይል በመመደብ በቅርቡ ሥራ ይጀምራል ብለዋል።

የክልሉ ጤና ጥበቃ ቢሮም የህብረተሰቡን ተነሳሽነት በማየት ቀሪ ሥራዎችን ለማጠናቀቅ ቃል መግባቱንም አቶ ወንድሜነህ ተናግረዋል።

ህብረተሰቡም አሁን ያሳየውን ድጋፍ አጠናክሮ በመቀጠል ሌሎች መሰረተ ልማቶች እንዲሟሉ እገዛ ማድረጉን መቀጠል አለበት ብለዋል ምክትል አስተዳዳሪው ።

ጤና ጣቢያው በአካባቢው በተገኘ የደን ሽያጭ በ2 ነጥብ 8 ሚሊዮን ብር ተጀምሮ በመቆሙ፣ ከባለሃብቶችና ከምሁራን በተሰበሰበ ብር እንዲሁም ከአልማ በተገኘ 4 መቶ ሺህ ብር ድጋፍ በ2 ሚሊዮን 260 ሺህ ብር ወጭ ለምረቃ በቅቷል።

ጤና ጣቢያው ሥራ ሲጀምርም ከ15 ሺህ በላይ የህብረተሰብ ክፍሎችን ተጠቃሚ ያደርጋል ተብሏል።

ዘጋቢ፦ አማረ ሊቁ – ከምዕራብ ጎጃም ዞን

ተጨማሪ መረጃዎችን ከአብመድ የተለያዩ የመረጃ መረቦች ቀጣዮቹን ሊንኮች በመጫን ማግኘት ትችላላችሁ፡፡

Source link

Related posts

አገር አቀፍ የማኅበረሰብ ተኮር የምክክር መድረክ በባሕር ዳር እየተካሄደ ነው።

admin

የኢትዮጵያ ንግድ ባንክ በአንዳንድ የአገልግሎት ዘርፎች ላይ የዋጋ ማሻሻያ አደረገ

admin

ኢትዮጵያ እና እስራኤል በፋርማሲዩቲካል እና አይሲቲ ዘርፍ በጋራ መስራት በሚያስችላቸው ጉዳዮች ላይ ተወያዩ

admin