31.01 F
Washington DC
March 2, 2021
Satenaw Ethiopian News/Breaking News
Amharic News

ለሀገራዊ መግባባት በሕገ መንግሥቱ ላይ የሚነሱ የማሻሻያ ጥያቄዎችን መመለስ እንደሚገባ ከአማራ ክልል የተውጣጡ የወረዳና የዞን ብልጽግና ፓርቲ የፖለቲካ ዘርፍ ኀላፊዎች ተናገሩ።

ለሀገራዊ መግባባት በሕገ መንግሥቱ ላይ የሚነሱ የማሻሻያ ጥያቄዎችን መመለስ እንደሚገባ ከአማራ ክልል የተውጣጡ የወረዳና የዞን ብልጽግና ፓርቲ የፖለቲካ ዘርፍ ኀላፊዎች ተናገሩ።

ባሕር ዳር: የካቲት 06/2013 ዓ.ም (አብመድ) ሠላም ሚኒስቴር ያዘጋጀው ከወረዳ፣ ከዞንና ከክልል ለተውጣጡ የአማራ ክልል ብልጽግና ፓርቲ የፖለቲካ ዘርፍ ኀላፊዎች በሀገራዊ ሠላም ግንባታ እና ብሔራዊ መግባባት ላይ ያተኮረ የግንዛቤ ማስጨበጫ መድረክ በባሕር ዳር ከተማ እየተካሄደ ነው።

የሠላም ሚኒስትር ሙፈሪሃት ካሚል አማካሪ ራህዋ ሙሴ (ዶክተር) እንደገለጹት የመድረኩ ዋንኛ ዓላማ በግለሰብ፣ በቤተሰብ፣ በማኅበረሰብ፣ በልሂቃን እና በመንግሥት ደረጃ ስልጡን የምክክርና የውይይት ባሕል ማዳበር ነው። በኢትዮጵያ ብሔራዊ መግባባት እንዲፈጠር እንዲሁም የሚኒስቴሩ የሠላም ፖሊሲና ስትራቴጂ እውን እንዲሆን የተለያዩ የግንዛቤ ማስጨበጫ መድረኮች እየተካሄዱ መሆኑንም ተናግረዋል።

መድረኩ የሀገሪቱን ማኅበራዊ ሀብት ጥቅም በማሳወቅና በሕግ የበላይነት ላይ ግንዛቤ በመፍጠር ሀገራዊ መግባባትን የማጎልበት ጥቅም እንዳለውም አመላክተዋል።

በሠላም ግንባታ ላይ የሕዝብን ተሳትፎ ለማሳደግም ጉልህ ሚና ይኖረዋል ያሉት ዶክተር ራህዋ በሕዝብ፣ በመንግሥት እና በልዩ ልዩ የሲቪክ ማኅበራት መካከል ጥምረት እንዲዳብር ያለውን ሚናም አብራርተዋል።

በማኅበረሰቡ ውስጥ ያሉ የአብሮነትና የወንድማማችነት ዕሴት፣ የችግር አፈታት ሥርዓቶችና ሌሎች ማኅበራዊ እሴቶች ሀገራዊ መግባባት እንዲፈጠር ከፍተኛ ሚና እንደሚጫወቱም ገልጸዋል።

የሠላም ፖሊሲና ስትራቴጂው በሀገር በቀል እውቀቶችና ማኅበራዊ ሀብቶች ላይ የተመሠረተ መሆኑንም አንስተዋል፡፡

ሠላም ሚኒስቴር በሀገሪቱ አስተማማኝ ሠላም እንዲሰፍን እና ሀገራዊ መግባባት እንዲጎለብት እየሠራ መሆኑን አስታውቀዋል።

የውይይቱ ተሳታፊዎች የሠላም እሴት ግንባታና ብሔራዊ መግባባት ለሀገራዊ እድገት ያለውን ፋይዳ እንደተገነዘቡ ተናግረዋል።

በማኅበረሰቡ ዘንድ ያሉ መልካም ዕሴቶችን ማጎልበት እና የታጡትን የመመለስ ሥራ እንደሚጠበቅባቸውም አመላክተዋል። ምንም እንኳን እንደ ሀገር መቀጠል የሚያስችሉ ሀገራዊ ዕሴቶች ቢኖሩም የአብሮነት እሴትን የሚሸረሽሩ የሕግ ማዕቀፎች በሕገ መንግሥት ደረጃ መቀመጣቸውን አንስተዋል።

የእነዚህ የሕግ ማዕቀፎች ውጤት ከፍተኛ አደጋ እያስከተሉ መሆኑን የአዊ ብሔረሰብ አስተዳደር ብልጽግና ጽሕፈት ቤት የፖለቲካ ዘርፍ ኀላፊ ብርሃኑ አያሌው ተናግረዋል። በተለይ የአማራ ክልል ሕዝብን ከፍተኛ ዋጋ ማስከፈሉን በማንሳት የሕገ መንግሥት ማሻሻያ እንዲደረግ ትግል ይደረጋል ብለዋል።

መሻሻል የሚገባቸው የሕገ መንግሥት አካሎች እንዲሻሻሉ የክልሉ መንግሥት በትኩረት እየሠራበት መሆኑንም አንስተዋል።

ሌሎች አስተያየታቸውን የሰጡ የወረዳና የዞን የፓርቲ ኀላፊዎችም ባለፉት ጊዜያት የተፈጠሩ ችግሮችን መፍታት የሚያስችል ስልጠና እየወሰዱ መሆኑን አስታውቀዋል።

ለሀገራዊ መግባባት በሕገ መንግሥቱ ላይ የሚነሱ የማሻሻያ ጥያቄዎች ሊመለሱ እንደሚገባ የተናገሩት ሰልጣኞቹ ሠላም ሚኒስቴርም ለጉዳዩ ትኩረት ሊሰጠው እንደሚገባ አመላክተዋል።

ዘጋቢ:- ደጀኔ በቀለ

ተጨማሪ መረጃዎችን ከአብመድ የተለያዩ የመረጃ መረቦች ቀጣዮቹን ሊንኮች በመጫን ማግኘት ትችላላችሁ፡፡

Source link

Related posts

የአማራ ክልል በግንባታ ላይ የሚገኙ የመስኖ ፕሮጀክቶችን ለማጠናቀቅ እንደሚሠራ አስታወቀ

admin

“ከቀደሙት የቀደመ ርቆ ለመሄድ ያለመ”

admin

በሰሜን ሸዋ ዞን ከ760 ሺህ ኩንታል በላይ ምርት በመስኖ ለምቶ ለገበያ መቅረቡን የዞኑ ግብርና መምሪያ ገለጸ፡፡

admin